ŠLOVEK Z DELTI
Jedan busen liep
ću si nać i ses
na delto ko si vizberen
kad buo štajuon
/i kat se uštajonan/.
Vele vodi će se tamo miešat
i veli brodi će prihajat.
eroplani će mi sos.
I tići će preletuvat me
na juh kad buodo leteli
a dica mi mahat
z provi broda ki pasievajo,
i si će me z dugega poznat.
Još bolji od busena bi bi
turan, ali neka lantierna
ka je odrabila…
aš bi mi tići bili bliže
i bolje bin videla.
Pa kat buoden tako tamo,
sela na delto seh delti,
na kejste se sve rieki
prelievajo va sva muore
oniput ću lahko imet navar
od kuot ćeš kapitat.
RUOJŽE
to san ja tajsti
ka lačin na muore,
i balin dugo i išćen
hlat mu va špieglje
to san jas ta mras
po te trave
prvo nego sunce prošćuri
ta grat ki uklati je
se okoli sebe
to san jas ta mižeran stuor,
to ruojže rashitano po brajdah
i pres veri da će mi se
grozdi zlatet na granah
pres da ti Bože umiešaš
soji prsti
POBUNA PUPIC NA ŠPAGE
One cupkajo tako
kako ih činijo cupkat
i stišćo piesti i se smejijo
ku rabi na silo.
Kako će drugi one
pliešo, i trzajo z glavuon
tobože da će se dica smejat
a dica ih imajo strah, neka,
a druga ih ubrtičajo.
I tako gredo napret
kako ona strašila ot slami
strhlenijo na sunce, ali
zabljene na šufite
uživajo mir, neki put.
Plakat ne umijeo
aš tuga je njiha blokana i
podobna busulu na cimitre.
Samo nekiput skračijo
i storijo štrahaus
pak in popucajo konci
i buodo samo štraci.
Kako jas danas.
MRKAT
Kupujen danas
na kredit nasmiejki
kako rubidnice
od keh zustaju muštafi
i prsti blavi.
Kupujen danas
na kredit
okolivratki tepli
ki rasfreškievajo.
Kupujen i delan
zimnico,
rashićievan se
i kupujen,
aš mrazno je
va srce mojien.
Kupujen pogledi
ki se hitajo z iskricami
ki frcajo i ki život
tornievajo
rieke zlite
van korita.
Na klič dajen danas, da
kupujen na kredit
i srce stavljan
pod hipoteko.
PRIDI PUO ME
Tu san na križiere,
a debelo već je nuoć
i naslažen je mras na naše
kori…
i nisan već sigurna
san li jas to ona oznuotru
ali san te faši okoli mene,
nešto kako Lazarove faši…
Jie li bi život
to ča se namata okoli tiela
kako faši okoli ran,
i ja li se namata
ali se strže z nas?
A ono nešto gre na kalo
i sve tanje je i manje,
a faš muoj šlovek…
skorena krf, faša na fašo i
nien ne zna povedat
ča delan tu
kat već je debelo nuoć,
ni će me ali me jie mrak.
Prozies će mi srce
a ne moren se ganut…
Pridi puo`me.
SAN GA SO
Li je bi riva
rastrešen i sprekidan
i mučan i trudan,
beseda mu je zadela va gute.
Li je bi riva
so ga so
milo nuoć čekali.
Zmanjkalo je bilo sapi
i fuorci,
ka rišć je bilo puoć
na nogi
ta puot, ta put,
potrpet puot i nemoć
i debuleco i sve.
I puoć.
Ni bilo fari postajkevat.
Li je bi riva
so ga so
milo nuoć čekali.
Trdila je samo sebe
samo kat je priša,
potle ćemo rani zaceljevat,
potle ćemo brisat puot,
potle ćemo škuži pravdat,
neka samo buode tu.
San ga so
milo nuoć čekala…
ZA FAT TEBE
Ku nisi ni imie za prit
ni pasat,
ni kapitat,
ja san jur od svoje čeki
storila spomenik
za fat nas
I oniput me je spasilo
ono znaš ona je malo ćaknuta,
ona malo živi va oblakah…
A ja san tamo
kako doma,
ja san tamo plaćala krediti,
prala podi
i bielila za Božić
i Vazan,
svuoj dan.
Pofat seh sanj.
HĆERI DEDALOVE
čuda potle ću bit
polarni medved
veli i biel
sam na Antartike
a mogle smo letet
ku smo tele
i kat got smo tele
samo mi dvie
i nismo se prečinjale
smo letele ku smo tele
jušto zaspravlje materi
imajo Dedalode krvi
Naručite ovo izdanje:
Izdanje: Nada Galant: Zuz zit (izbor)