DRUŠTVO HRVATSKIH KNJIŽEVNIKA
Osnovano 1900.Đurđa Vukelić Rožić
Kratka priča "Kornišoni".
Kornišoni
Letno ferje je. Pri nami su vnuki i vnučice ze Zagreba i Varaždina. Četiri ih je, drčiju po dvorišču, nateravleju kokoši, svade se z gusakom, brčkaju se v bazenu na slivaru, loptaju, prelepo im je. Jeju domaču ranu, a bome su ta dva meseca zrasli i pocrneli na suncu, za neveruvati. A onda je stareši vnuk poprosil naj bi negov pajdaš došel k nam i bil pri nami dva-tri dana. Nigda ni bil na selu pak bi štel videti o čemu je tu reč. Naj dete dojde, mesta za spanje ima, rane, fala Bogu, je, bu nam lepše če nas je više. Se vsi skup nekaj navčimo.
Denis je došel v belim platnenim šlapam i v potrganim lačam, takve ni najvekša sirotinja na selu ni imela. Negda, gda sme bili deca, naše su opravice i šoseki, lače, bili krpa na krpi, navek v obleki starešega brata ili sestre, sestrične z grada, ali tak potrgano? To bi bila sramota. Gazdaričine su ruke sekaj znale, a iglica i konec bili su im stalni pajdaši. Štela sem mu poiskati nekve lače ili trenirku, ampak mi je vnuk rekel da su to preštimane destrojd đins¹, jako moderno i skupo. Usput mi se pojadal da njemu mamica, moja dobra sneha, dozvoli same manje popularne ripd đins². To bum preverila z Guuglekom čim najdem malo cajta. Bome sirotinja, tej dečko, v glave. Kak cela vojska bedakov i poslušnikov, i on te, kak vele, trendsetere³ posluša.
Čim je zašel na dvorišče, problemi. Gledim ga s poceka štale, hodi po prsti kak tič kaj se ne ufa poleteti. Pazi kam bu stal da si preštimane šlape ne zmaže. Nis razmela kak se dovlekel oko zdenca do kopanje, a tam su guske imele svoj veliki lavor z vodu. Viknula sem Iveku, vnuku, naj mu da dedove galoše za nazuti na tenisice kaj ne bu gacal po blatu i guščjim drekima, i naj zapre putnu lesu. Posle me je Ivek pital, jel znam kuliko koštaju te šlape, pak sem imela za razmeti da mi nemremo tulike dobiti za Spartaka, pajceka kaj ga se spremamo v sobotu prodati na pijacu. Negvih stopedeset kil sem ranila leto dan, tri put na dan, svetek il' petek, če je kaj bolelo ili me prijela lenost. Nema izgovora, godišnjega odmora ili bolovanja. Životinje moraju imeti svoj red. Ime Spartak mu je dala vnuka Gordana, nekaj ze školum. A se na svoje ime prifčil i on i mi, same, naša Goga ni bila na čisto kaj se stalo z onim lepim, malim micekom od pajceka i kak je tak brzo zrasel. On je još dobro prešel, brat mu se zove Pompej.
Kesneše, gost se zabavlal z decom, a jen čas je ostal sam blizu drvocepa, pred šupom. Imel je velike probleme, vikal je kaj da ga vragi koleju. Tvrdokrilec je splazil po tem skupem lačam i čez luknju zašel, kam je zašel. Dečec se ni ufal ni pomeknuti. Mobitel v žepu je zvonel, a kvočka je to razmela kak opasnost za pileke. Tukla ga je z klunom i krilmi i kreščala. Dobežale su guske i gusak, pevec je doletel, same su vatrogasci faleli.
Nazvat ću te kasnije, upravo me je napao Tyrannosaurusrex⁴ i likovi iz tri crtića!
Bem ti kola i kotače. Još se nis snašla kaj bi spasila dečka z diznivorlda⁵, ampak se odnekud spuknula MisPigi⁶, cela zmazana, se valda v gnojčine ladela. Bežala je dijagonalno po dvorišču, očesala se na joher, popila malo vode z guščjega lavora i z gubicu ga prevrnula, pak ravno na otrptu lesu i beš na cestu. Se tirala! Ta je sama vsaki put odbežala k Matičovom bicku, ni bogec imel ime, a su vsi pajceki v okolici bili negva deca. To z imenom je bilo pametno, nisu krmače mogle iskati alimentaciju za pajceke. Slično kaj onaj Dostavlač, kaj je vu američki komediji prodaval već kaj je prodaval pak je imel prek petsto dece⁸. A naš gradski selak ni zaprl lesu za sobu.
Mam sem vidla masni naslov v crne kronike. Mladi Zagrepčan stradao pod krilima razjarenog Tyrannosaurusreksa i MisPigi. Gornje Moslavačko Selo. (Ni Moslavina, ni Posavina, ni Slavonija, ni Prigorje, ni Zagrebačko predgrađe, ni Vojna krajina. Ni Habsburška Monarhija. Ni vrit, ni mimo.). Još jedino, a koji pak to vrak je, ti Tyrannosaurusreks?
Dečeca sme komaj spasili od naše životinjske farme⁷. Ostal je v komadu, a več ni bil svoj. Gda je sused Matič javil da je priprl MisPigi, išlo se obedvati. A naš gost, sedi i gledi zdele i tajnere pune jela. Naredila sem francusku šalatu, spohala belo meso od tri pileka i ostatek jenoga, kak mi je Ivek prišepnul. Am nas je bilo šest za stolom, treba rane. A treba i nekaj povečerati. Ne bi se čudila ak se kum Jandra navrne, vidla sem ga, rano vjutro je z trakturom išel prema štreki i ko zna kam. Poštar je v to vreme ružil ze svojim motorom, a ni bil srameči, domači dečec. Ak je potrefil, če si ga zval k obedu, dobri odgoj je nalagal da se lepo najê i pofali kuvaricu. Žena ili dekla zna kaj je red: pita za recept i navek je dobrodošla k stolu. Ali, kolega je obležnjeni i z fine hiže. Računala sem, nekak bumo zbavili, a friški zrak i glad pomoreju. Sega je na stolu bilo. Zelena šalata z našega vrta, domača cikla i kiseli vugorki v zdelički, Martina, vnuka je voli. Pohano meseko i kiseli vugorek, saki čas je v kujni i vkradne si malo za pod zub. A ni čudo, kuliko drči po dvorišču, lovi miceke po parmi, z dedom po livadi bere trave za čaj, a v čošku jograde je naredila i svoj mali vrt. Gda dojde, tu malo prčka i kopa z motičicum, kaj su još nejna mati i tete imele kaj curice. Ja tam piknem kakov cvetek ili flanec povrča, pak se dete veseli.
Kad, gledi Denis vugorke i pita jel su isti takvi vu ti francuski šalati. Ja velim po istine, jesu, to su vugorki z našega vrta, ja sem je kiselila, domaći. Nešpricani. Na odstalom štalskom gnoju su zrasli, to je kak se veli, čista jeko rana. On me je pogledel kak da mu je stršlen zašel v vuvo i rekel:
Ja jedem samo Podravkine kornišone! Iz marketa! Nikakav gnoj, molim lijepo!
Kornišoni, majke ti mile, a kaj je to? Vu vsakom slučaju, sofisticerani potrošač (profinjen, istančana ukusa, iskusan, op. Ifkica). Te zna kaj oče! Gledimo se moj Jožek i ja. Deca su falila pohanoga pileka i francusku šalatu, Jožek se vtaplal v antibijotske juve od frtal kokoši v penziji, lepe masne, i tak pol kile govedine, a gost je sedel i gledel kak se mi ranimo. Nis znala kak bi vilicu držala, a požerak mi se činil veliki kak i krokodilu. Ren i kuvano meso, kak da su mi jezik zfaširali. Če žvačem, zgledelo je da se čuje do meseca. Kornišoni, kornišoni, kornišoni. Gde sem to čula ili prečitala. Nikak se setiti. Je to meso, je to povrče, voče, sir? Na kaj se to dete navleklo? Jadna ta mater, kak ga je odranila? Kad, veli Jožek našemu gostu:
Dečko, znaš kaj? Ovak bu. Ve ti na novci, sedi na beciklina, tam ti je pri štali, i odi si kupi te svoje kornišone. Ni red da si gladni. Ne v moji hiži.
Štela sem reči i v moji, naši, al ni bilo vreme za rat naš svakdašnji. Sad sme imeli pametnega neprijatela. Mam se redi zbijaju.
Nije potrebno, jeo sam prije puta, hvala na brizi.
Gda je penez i cajta, i pametni pobedasti, a deca se prifčiju na kajgod, nemreju z te kože van! Navek su roditeli krivi, a pak, ni oni se nesu s diplomom o odgoju dece rodili. Če danjgubiju, deca se pokvariju. Fali im ta, kak vele, odgovornost. Gda si na selu, nemaš gda danjgubiti. Če očeš imeti krov nad glavom, puni drobec i decu školuvati, zasučeš rukave, mučiš se, skrbiš i ješ vse kaj ti na stol daju, ili kaj si sam skuvaš. Jelo se nesme rashitavati, to je greh. Leto za letom, briga na brigu, tak dozreliš i onda si pametni i mudri selak. S kterega se vsi smeju i delaju bedaka. Da te, gospodski gradski stalež treba na kornišonima odraniti, to pak nis čula. A se kladim da nesu zasukali rukave i uzgajali te kornišone. Konišslone, tak bum zapametila. Kak je kuvaju, faširaju za šnicle ili morti v rol mečeju peči? Kotlovina? Je to gliva?
Nikak se setiti... Kornišoni, kornišoni... Jel gdo v selu uzgaja kornišone? Pasmina ovce, koze? Kakva je pak to egzotika? Gde je nabavlaju? Nekaj slično kaj kak se zoveju... alpake, takvoga kaj? Grehota je jesti te lepe životinje, morti nam baš one daju lek za koronavirus. Imela sem videti na Internetu, švedski znanstvenik je pisal o istraživanjima gore na severu.
I, da znate, ja jedem pileće medaljone, samo one kupljene smrznute u našem marketu.
Firma ta i ta. Nis dobro čula ni zapametila. A, majke ti premile! On vuz kornišone jê i medaljone, kuplene v dučanu tem i tem v svemu kvartu. Punjene ze sirom i šunkom. Digla sem se i na stol donesla desku z prevelim domačim sirekom, špekom, suvu češnjovku, belu kobasu, komadič šunke, čupek strajbanoga kiseloga mleka, onak z vrhnjem, i pehar pun stepkof. Reku, zemi si kaj ti paše prede nek si odeš kupiti kornišone i medaljone, da buš mogel beciklina gaziti, am je to petnajst kilometri za prejti. V mislima sem blagoslivlala našu pametnu decu i vnuke, od punoga stola se nigda nesu lačni digli. Zdravi i lepi, nigdo ni zahirel i probleme delal, šteli su se najesti kak Bog zapoveda.
Dečko sedi i gledi. Od muke, mi jeme kaj da sme tri dana štrajkali z gladi. Z punimi zubmi se menše mudruje. Gda drobec ima puno posla, mozek dremle. Mozek i drobec su konekted. (Povezani, op. Ifkica). A zgledi da im multitasking (višezadaćnost, op. Ifkica) baš nejde. Gda se zabavle s preveč rane v dropcu, pamet ostavi gazdu na miru, a gazda ga pusti naj si misli da je gazda. Tak nekak.
Očeš da ti kokošja ili racina jajca spečem? Očeš orehnaču, morti kuvano jajce z maslinovim uljem? Imam odojka od čera, fini, reš pečeni.
Ne, hvala najljepša, gospođo Ifkica.
Meso zalejano z masti, prefino!
Ništa, hvala.
Bem ti pišlivi oreh! Pak sem i gospođa, lepo za čuti, a morti se sprda zmenum. Če i je tak, ni prvi ni zajni. Ifkica ima dobri imunitet na to, kak i alpake na koronu.
Isti dan je Kornišon pobegel na vlak, domom k svojem. To dete košta penez i živcof kak deset druge dece. Pitala sem vnuka, kaj mu otec dela, je advokat ili minister, poduzetnik, a veli da dela v skladišču, a mati je kuvarica. No tak! Bokci roditeli delaju dan i noć kaj bi on glumil gospončeka. Bi ga ja s koprivum po riti da je moj. Posle sem išla guuglati naj bi vidla kaj to ti vražji kornišoni zaprav jesu, (franc. – cornichon., op. Ifkica), i nikak dojti k sebi kak sem od toga deteta puno navčila.
¹Destrojd đins (destroyed jeans) – nove traperice posebno dizajnirane i obrađene, s razderotinama, rupama, lacijacijama; pohabane kako bi izgledale iznošene.
²Ripd đins(ripped ili distressed ili boyfriend jeans) – nove traperice sa oštećenjima, znatno manjim od destroyed jeansa. Izbrušeni izgled postiže se rašpanjem sa šmirgl-papirom, ribežom za sir, metalnom vunom, zarezivanje rezačem itd., što tinejdžerima i adolescentima omogućava da sudizajniraju svoje omiljene traperice.
³Trendseter – onaj koji nameće trend u društvu (smjer, modu, način razmišljanja)
⁴Tyrannosaurusrex – prema časopisu Science, znanstveno je potvrđena teza o vezi između ptica, kokoši i dinosaura, te se potonji smatra njihovim dalekim pretkom (65 mil. godina).
⁵Diznivorld – svijet crtanih junaka autora Walta Disneya
⁶MisPigi (Miss Piggy) – primadona prasica iz The Muppet Showa
⁷Životinjska farma – satirična novela Georgea Orwella, (Animal Farm, 1945.) o grupi životinja koje su osvojile farmu za sebe.
⁸Delivery Man (2013), američka komedija, glavna uloga Vince Vaughn
Rječnik:
drčati – trčati
nateravati – natjerivati, juriti, ganjati koga
navčiti – naučiti
poiskati – potražiti
pocek – kućni prag
pijac – sajam
drvocep – prostor oko panja za kalanje cjepanica za ogrjev
kreščati – kriještati
laditi se – hladiti se
očesati se – počešati se
otprta – otvorena
trknuti – udariti
koleju – kolju (klati)
zavuzlati – ispreplesti, zarobiti, pokoriti
parma – štagalj, škedenj, sjenik
frtal – četvrt
faširati – samljeti, usitniti
danjgubiti – gubiti vrijeme, ljenčariti
skrbiti – privređivati, stvarati, razvijati se u materijalnom smislu
bedak – osoba sklona postupcima na svoju štetu
preveli – polusuhi (domaći sir)
lačni – gladan
zahiriti – ostati tjelesno nerazvijen, zakržljao
drobec – trbuh
Đurđa Vukelić Rožić, Ivanić-Grad
e-mail: dvrozic@gmail.com
Priču lektorirala: Ivana Cerinski, prof.